اكتشاف نجوم الثقوب السوداء من وكالة الفضاء الأوروبية أو الـ"ESA"
في 1989، وكالة الفضاء الأوروبية أو الـ"ESA" اطلقت مركبة فضائية علمية، أو قمر صناعي علمي اسمه " هيباركوس " أو "Hipparcos" علشان مهمة لطيفة كدة، ايه؟، عايزين قياسات دقيقة لمواقع الأجرام السماوية.
النجوم وحركتها وايه اللي في النظام النجمي الفلاني و فين وبيعمل ايه، ومين بيدور فين وحوالين مين .
علشان نعرف السماء فيها ايه حوالينا بإختصار. و هيباركوس من وقت اطلاقه خلانا نفهرس حوالي 100 الف نجم بدقة شديدة تمامًا، وحوالي مليون غيرهم بدقة اقل شوية.
بس الكابتن ده كان حجر الاساس الاول للمهمة التي بدأت بعدها في اننا عايزين نعمل خريطة كاملة للفضاء حوالينا، بالتفصيل، المهمة اتوافق عليها سنة 2000، بس المرصد نفسه تم إطلاقه في 2013، والجديد ده اسمه جايا أو GAIA.
مرصد جايا او GAIA.
جايا على عكس التاني، اهتمامه الاول مش انه يستكشف الجديد، لكن يراقب القديم ويرسم خريطة كاملة 3D للسماء في محيط التقاطه. يراقب النجوم وتصرفاتها بدقة تامة، حركتها فين، اتجاهاتها ايه، بتتأثر بمين ومؤثرة على مين، وهل كل حاجة هناك برا خاضعة لقوانين الزمكان أو للنسبية العامة بتاعت آينشتاين ولا ايه الحوار.
وفي نفس الوقت، الدقة في القياس ومراقبة الاجسام دي بتخليه يكتشف الكواكب القزمة، الكواكب الاكبر، الكويكبات، والنيازك، في محيط النجوم أو الشموس دي. جميل الموضوع؟، جميل الموضوع.
الحوار ده لسه شغال ولو عاوزين تعرفوا عنه أكتر هسيبلكم لينك المهمة نفسها من وكالة الفضاء .
لينك مهمة GAIA من الموقع
اكتشاف غريب.
العلماء القائمين على " تفصيص " المعلومات اللي جاية دي، وتحليلها وجمع الداتا منها، لقوا ان في واحد من النظم النجمية اللي كانوا عارفينها سابقًا، البيانات بتاعته مش منطقية، بمعنى؟.
النظام ده على حسب المعلومات اللي نعرفها عنه، مكون من شمس، قد الشمس بتاعتنا كده، تقريبًا نفس التركيب بالظبط. بتدور حوالين ثقب أسود أكبر ب11 مرة، ضخم، على مسافة 1.4 وحدة فلكية عن بعض ( دي وحدة القياس اللي بيتقاس بيها الحاجة في الفضاء علشان المسافات مش زي هنا ).
والشمس تخلص دورتها حوالين الثقب الأسود كل 187.8 يوم. جميل؟، قشطة زي الفل فين المشكلة.
المشكلة ان البحث اللي نشروه بيقولك، في الواقع.. تفاصيل الاتنين بتدل على ان البتاع الضخم اللي الشمس بتدور حواليه ده، مش ثقب أسود 😀.
شمس تانية يعني واحنا شفناها غلط؟، لا هي سودا، احنا شايفين صح، بس ده مش ثقب أسود.
علشان اعفيكم من الرغي الكتير ومحاولة شرح هو ليه مش ثقب أسود بحسب البحث الجديد.
لينك البحث ( تقدروا تعملوا داونلود للملف من الجنب عاليمين ) :
حجم الثقب الأسود، والشمس اللي حواليه، وطريقة الدوران بالمنظر ده بالدقة دي لملايين الملايين من السنين، بتقول ان ده مينفعش يكون ثقب أسود ولو كان كدة الشمس دي مكنتش هتبقى هنا.
طب لو هو مش ثقب اسود امال ده ايه؟.
نجوم سوداء غريبة.
العلماء يقترحون حاليًا ان ده نوع جديد تمامًا من النجوم، مشفناش منه قبل كدة، نجم من المادة السوداء 😀.
المادة السوداء دي لو متعرفش هي بإختصار كدة تفسير ان في فرق بين كتلة الكون كلها، وكتلة الكون المرئي، والفرق ده موجود على شكل جسيمات مظلمة مكونة شبكة أو رابط بين كل شبر في الكون كله، متوزعة بطريقة سلسلة في كل حتة في الكون واحيانًا على حسب بعض النماذج ممكن تتجمع سواء، لا تبعث ضوء، ولا تمتص ضوء، ولا أي إشعاع كهرومغناطيسي.
احنا منعرفش عنها كتير، خالص الحقيقة يعني احنا في الحتة دي مازلنا بتهرش في دماغنا، بس اللي نعرفه حاليًا. إن على المستوى الادق اللى احنا وصلناله.
كل حاجة مكونة من جسيمات اولية، نوع جاية منه الجسيمات بتاعت الذرات ( بروتونات وإلكترونات ونيوترونات ) اللي هي بتلم على بعضها وتكبر و تكونلك كل حاجة في حياتك بقى، الهواء، الماء، التراب، الشاشة اللي قدامك دي، كل حاجة في الكون. الجسيمات النونة دي اسمها " فرميونات ".
والنوع التاني دول اسمهم " حاملات القوى " ودول اللي شايلين على كتافهم القوى الاربعة الاساسية اللي نعرفها في الكون ، الجاذبية، والكهرومغناطيسية، والنووية الضعيفة والقوية. والنوع ده اسمه " بوزونات ".
احنا حتى الآن معندناش فكرة عن كل البوزونات بس المادة المظلمة تعتبر منهم، مكونة منهم، والجسيمات دي بتقدر تنتشر في الفراغ وبالتالي دول الشبكة اللي جامعة كل حاجة في الكون بس احنا مش شايفينها بعنينا المجردة.
مكونات نجوم الثقوب السوداء.
النجم الجديد ده، النظرية المقترحة انه نجم كامل من نوع جديد من البوزونات عنده قدره يتجمع ويكون شكل نجم وله طاقة كهرومغناطيسية أو "electromagnetic force" . و أطلق عليه على حسب البحث الجديد ده boson star.
البحث مازال قيد الدراسة ومازال بيتجمع عليه داتا زيادة و بيتراقب النظام ده كله زيادة تاني، بس لو تم إثباته يبقى انت كدة في 2023 كواحد قاعد في حاله، كنت شاهد على لحظة تاريخية اكتشفنا فيها نوع كامل من النجوم الجديدة الموجودة في الكون واللي مكونة من المادة المظلمة.
كأنها ظِلال عايشة معانا كدة، لا تتفاعل مع باقي الجسيمات المرئية، ولا بتشوفها، ولا بتمتص اي حاجة زي الثقوب السوداء ولا بيطلع منها حاجة.
بس بما انها جزء من الكون حواليك، وبعد نظرية التشابك الكمي اللي اتكسب عليها نوبل السنة اللي فاتت دي اللي بتقولك كل الجسيمات طالما لمست جسيمات تاني في لحظة ما في حياتها، فهي في تشابك معاه للأبد.
وبالتالي كل الكون متشابك مع بعضه للأبد.
فأنت الظلال المظلمة دي، متشابكة مع الكون ومعاك للأبد. وشايلة طاقة ومعلومات وكل الحاجات الحلوة دي، بس انت كل اللي شايفه منها " الفراغ " اللي هي سايباه في السما بس.
زي ما قلتلكم فوق الاكتشاف عظيم، ومرحلة جديدة في حالة " ايه اللي بيحصل في السماء ده "
تعليقات
إرسال تعليق